കുന്ദമംഗലം: ചാത്തമംഗലം താഴെ 12ൽ സ്വകാര്യ ബസ് നിയന്ത്രണം വിട്ട് മരത്തിലിടിച്ച് അപകടം. ശനിയാഴ്ച വൈകീട്ട് 3.45ഓടെയാണ് അപകടം ഉണ്ടായത്. മുക്കം ഭാഗത്തുനിന്ന് കോഴിക്കോട്ടേക്ക് പോവുകയായിരുന്ന സ്വകാര്യ ബസാണ് അപകടത്തിൽപെട്ടത്. അപകടത്തിൽ 26 പേർക്ക് പരിക്കേറ്റു.
അപകടസമയത്ത് ബസിൽ നിരവധി യാത്രക്കാർ ഉണ്ടായിരുന്നു. പരിക്കേറ്റവരെ മണാശ്ശേരിയിലെ ആശുപത്രിയിലും മറ്റ് ആശുപത്രികളിലും പ്രവേശിപ്പിച്ചു. പ്രദേശവാസികളാണ് രക്ഷാപ്രവർത്തനം നടത്തിയത്. ഇടിയുടെ ആഘാതത്തിൽ ബസിന്റെ മുൻഭാഗം പൂർണമായും തകർന്നു. എതിരെവന്ന കാർ മറ്റു വാഹനങ്ങളെ മറികടക്കാൻ ശ്രമിച്ചതാണ് അപകടകാരണമെന്ന് നാട്ടുകാർ പറഞ്ഞു.
