ഹോട്ടലുകളിൽനിന്ന് പഴകിയ കുഴിമന്തിയും അൽഫാം ചിക്കനും പിടിച്ചെടുത്തു

നഗരസഭ ആരോഗ്യവിഭാഗം പയ്യോളിയിൽ നടത്തിയ കർശന പരിശോധനയിൽ പഴകിയതും വൃത്തിഹീനവുമായ ഭക്ഷ്യസാധനങ്ങൾ പിടിച്ചെടുത്തു. നഗരത്തിലെ പത്ത് സ്ഥാപനങ്ങളിൽ തിങ്കളാഴ്ച നടത്തിയ പരിശോധനയിൽ ന്യൂനതകൾ കണ്ടെത്തിയ മൂന്ന് സ്ഥാപനങ്ങൾക്ക് നോട്ടീസ് നൽകി.

അജ്‌വ ഫാസ്റ്റ്‌ ഫുഡ് എന്ന സ്ഥാപനത്തിൽ നിന്നും പഴകിയ കുഴിമന്തി റൈസ്, അൽഫാം ചിക്കൻ എന്നിവ പിടിച്ചെടുത്തു. ‘പയ്യോളി ചിക്കൻ’ ഹോട്ടലിൽനിന്ന് ഉള്ളി കഴുകാതെ പാചകത്തിനായി അരിയുന്നത് കണ്ടെത്തി പിടിച്ചെടുത്തു. ന്യൂനത കണ്ടെത്തിയ ‘ശബരി’ ഹോട്ടലുടമക്കും നോട്ടീസ് നൽകി.

ഹെൽത്ത് ഇൻസ്പെക്ടർ ടി. ചന്ദ്രൻ, ജൂനിയർ ഹെൽത്ത് ഇൻസ്പെക്ടർമാരായ ടി.പി. പ്രകാശൻ, ഡി.ആർ. രജനി, സാനിറ്റേഷൻ വർക്കർ ബാബു എന്നിവർ പരിശോധനയിൽ പങ്കെടുത്തു. വരും ദിവസങ്ങളിലും പരിശോധന കർശനമായി തുടരുമെന്ന് ആരോഗ്യ വിഭാഗം അറിയിച്ചു.