നാദാപുരം: ഉമ്മത്തൂരിൽ പ്ലസ് ടു വിദ്യാർഥിയെ മർദിച്ചതായി പരാതി. സാരമായി പരിക്കേറ്റ എസ്.ഐ.എച്ച്.എസ് ഹയർ സെക്കൻഡറി പ്ലസ് ടു സ്കൂൾ വിദ്യാർഥി പാറക്കടവിലെ പുത്തൻപുരയിൽ മുഹമ്മദ് നിയാസിനെയാണ് (17) തലശ്ശേരി സഹകരണ ആശുപത്രിയിൽ പ്രവേശിപ്പിച്ചത്. ബുധൻ രാവിലെ ഒമ്പതിന് സ്കൂൾ ഗേറ്റിന് മുന്നിൽ നിൽക്കുമ്പോൾ അമ്പലത്തുങ്ങൽ അൻവർ മർദിച്ചെന്നാണ് പരാതി.
തലക്കും ചെവിക്കും സാരമായി പരിക്കേറ്റ മുഹമ്മദ് നിയാസിനെ നാദാപുരം താലൂക്ക് ആശുപത്രിയിൽ പ്രവേശിപ്പിച്ചു. വിദഗ്ധചികിത്സക്കായി പിന്നീട് തലശ്ശേരി സഹകരണ ആശുപത്രിയിലേക്ക് മാറ്റുകയായിരുന്നു. സംഭവസ്ഥലത്ത് ബൈക്ക് തട്ടിയതുമായി ബന്ധപ്പെട്ട് മറ്റ് വിദ്യാർഥികളും മർദനം നടത്തിയതായി പരാതി ഉയർന്ന ആളുടെ സഹോദരനുമായി നേരത്തേ വാക്കേറ്റമുണ്ടായതായി നാട്ടുകാർ പറഞ്ഞു. ഇതിനിടയിലാണ് നിയാസിന് മർദനമേൽക്കുന്നത്. വിദ്യാർഥിയെ മർദിച്ച പ്രതിയെ ഉടൻ അറസ്റ്റ്ചെയ്യണമെന്ന് കുട്ടിയുടെ ബന്ധുക്കളും നാട്ടുകാരും ആവശ്യപ്പെട്ടു. വളയം പൊലീസ് കേസെടുത്ത് അന്വേഷണം ആരംഭിച്ചു.
