കൊടുവള്ളി: നഗരസഭ കൗൺസിലിന്റെ മിനിറ്റ്സിൽ ചെയർമാൻ കൃത്രിമം കാണിച്ചതായി ആരോപിച്ച് കൊടുവള്ളി നഗരസഭയിലെ എൽ.ഡി.എഫ് കൗൺസിലർമാർ യോഗം ബഹിഷ്കരിച്ചു. വെള്ളിയാഴ്ച്ച 11 മണിയോടെയായിരുന്നു സംഭവം.
വിവിധ പദ്ധതികളുടെ ലിസ്റ്റ് അംഗീകരിക്കൽ പ്രധാന അജണ്ടയായാണ് കൗൺസിൽ യോഗം ചേർന്നത്. തുടർ ചർച്ചകളിലാണ് എൽ.ഡി.എഫ് കൗൺസിലർമാർ മിനിറ്റ്സ് വിഷയം ഉന്നയിച്ചത്. തുടർന്ന് പ്രതിഷേധം രേഖപ്പെടുത്തുകയും കൗൺസിൽ യോഗം ബഹിഷ്കരിച്ച് ഇറങ്ങിപ്പോവുകയും ചെയ്തു.
നഗരസഭയിൽ കഴിഞ്ഞ ഭരണസമിതി കാലയളവിൽ സ്ഥാപിച്ച 5,000 തെരുവ് വിളക്കുകൾ റിപ്പയർ ചെയ്യുന്നതുമായി ബന്ധപ്പെട്ട് ഒക്ടോബർ ആറിന് ചേർന്ന യോഗത്തിലെ മിനിറ്റ്സിലാണ് കൂട്ടിച്ചേർക്കലുകളും തിരുത്തലുകളും വരുത്തിയതെന്ന് എൽ.ഡി.എഫ് കൗൺസിലർമാർ ആരോപിച്ചു.
