കോഴിക്കോട്: വടകരയിലെ തിരുവള്ളൂരിൽ യുവതിയുടെയും രണ്ട് മക്കളുടെയും മൃതദേഹം കിണറ്റിൽ കണ്ടെത്തി. ആത്മഹത്യയാണെന്നാണ് പൊലീസ് കരുതുന്നത്. കുന്നിയിൽ മഠത്തിൽ അഖില(32), മക്കളായ കശ്യപ്(6), വൈഭവ്(ആറുമാസം) എന്നിവരെയാണ് മരിച്ചനിലയിൽ കണ്ടെത്തിയത്. യുവതി കുഞ്ഞുങ്ങളെ ശരീരത്തിൽ കെട്ടിവെച്ച ശേഷം കിണറ്റിൽ ചാടിയതാണ് എന്നാണ് കരുതുന്നത്.
അഖിലയെ ഫോണിൽ വിളിച്ചിട്ട് കിട്ടാത്തതിനെ തുടർന്ന് ഭർത്താവ് നടത്തിയ പരിശോധനയിലാണ് കിണറ്റിനുള്ളിൽ മൂവരുടെയും മൃതദേഹം കണ്ടെത്തിയത്. ഞായറാഴ്ച രാവിലെ 11മണിയോടെയാണ് സംഭവം. ഫയർഫോഴ്സ് എത്തിയാണ് ഇവരെ പുറത്തെടുത്തത്. ഉടൻ ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു. മൂന്നുപേരുടെയും മൃതദേഹം വടകരയിലെ ജില്ലാ ആശുപത്രി മോർച്ചറിയിലേക്ക് മാറ്റി. ആത്മഹത്യയുടെ കാരണം വ്യക്തമല്ല.
