കോഴിക്കോട്: കോഴിക്കോട് നഗരത്തിൽ കെഎസ്ആർടിസി ബസിനടിയിൽപ്പെട്ട് ബൈക്ക് യാത്രികരായ ദമ്പതികൾക്ക് ദാരുണാന്ത്യം. കുറ്റിച്ചിറ സ്വദേശി മുഹമ്മദ് കോയ (72), ഭാര്യ സുഹറാബി (62) എന്നിവരാണ് മരിച്ചത്. മാനാഞ്ചിറ എൽഐസി ഓഫീസിന് മുന്നിൽ വൈകുന്നേരം ആറോടെയാണ് സംഭവം.
കെഎസ്ആർടിസി ബസിനെ മറികടക്കാനുള്ള ശ്രമത്തിനിടയയിൽ റോഡിലെ ഡിവൈഡറിൽ തട്ടി ബസിനടിയിലേക്ക് ഇവർ മറിഞ്ഞു വീഴുകയായിരുന്നു. തുടർന്ന് ഇവരുടെ ശരീരത്തിലൂടെ ബസിൻ്റെ പിൻചക്രം കയറി ഇറങ്ങി. ഇരുവരും സംഭവ സ്ഥലത്ത് വെച്ചു തന്നെ മരിച്ചുവെന്നും പോലീസ് അറിയിച്ചു.
എന്നാൽ ബസിനെ മറികടക്കാനുള്ള ശ്രമത്തിനിടയിൽ ബസ് ഇവരെ ഇടിച്ചിടുകയായിരുന്നെന്നും അതറിയാതെ ബസ് മുന്നോട്ടെടുത്തപ്പോഴാണ് പിൻചക്രം ഇവരുടെ ശരീരത്തിലൂടെ കയറിയിറങ്ങിയതെന്നുമാണ് ദൃക്സാക്ഷികൾ പറയുന്നത്.
കോഴിക്കോട് കുറ്റ്യാടി തൊട്ടിൽപ്പാലം റൂട്ടിലോടുന്ന കെഎസ്ആർടിസിയാണ് അപകടമുണ്ടാക്കിയത്. അപകടം നേരിട്ടു കണ്ടുനിന്ന വിദ്യാർഥിനി സംഭവ സ്ഥലത്ത് കുഴഞ്ഞുവീണു. ഇവരെ പോലീസ് ഇടപെട്ട് ആശുപത്രിയിലേക്ക് മാറ്റി. ബീച്ച് ഫയർ ഫോഴ്സ് എത്തി റോഡ് കഴുകി വൃത്തിയാക്കി. ഒരു മണിക്കൂറോളം ഗതാഗതം തടസപ്പെട്ടു. സംഭവത്തിൽ ടൗൺ പോലീസ് കേസെടുത്തു.
