വിദ്യാർഥികൾ നല്ല മനുഷ്യരായി വളരാൻ ക്ലാസ്മുറികൾക്കുള്ളിലെ അറിവുകൾക്കൊപ്പം ക്ലാസിനു പുറത്തുള്ള അനുഭവജ്ഞാനങ്ങൾ കൂടി അനിവാര്യമാണെന്നു മന്ത്രി സജി ചെറിയാൻ. കേരള ലളിതകലാ അക്കാദമി സർക്കാർ സ്‌കൂളുകളിൽ നടപ്പാക്കുന്ന ‘സ്കൂൾ ആർട്ട് ഗാലറി’ പദ്ധതിയുടെ സംസ്ഥാനതല ഉദ്ഘാടനം കാരപ്പറമ്പ് ഗവ.ഹയർ സെക്കൻഡറി സ്‌കൂളിൽ നിർവഹിക്കുകയായിരുന്നു മന്ത്രി.
അടച്ചുപൂട്ടലിന്റെ വക്കിൽ നിന്നു മാതൃകാ സ്‌കൂളുകളിലൊന്നായി മാറിയ കാരപ്പറമ്പ് സ്‌കൂളിനെ പദ്ധതിയുടെ ഉദ്ഘാടനത്തിന് തിരഞ്ഞെടുത്തതു സംസ്ഥാന സർക്കാർ പൊതുവിദ്യാലയങ്ങൾക്കു നൽകുന്ന പ്രാധാന്യം തിരിച്ചറിഞ്ഞാണ്. വിദ്യാർഥികളെ ശാസ്ത്ര കുതുകികളും ചരിത്ര-സാംസ്‌കാരിക ബോധമുള്ളവരുമാക്കി മാറ്റുന്നതിലൂടെ നല്ല മനുഷ്യരാക്കി വളർത്തിയെടുക്കുക വളരെ പ്രധാനമാണ്. കോഴിക്കോടിന്റെ സാംസ്‌കാരിക ചരിത്രത്തെ അടയാളപ്പെടുത്തുന്ന ആർട്ട് ഗാലറി ഇക്കാര്യത്തിൽ അവരെ സഹായിക്കുമെന്നും മന്ത്രി പറഞ്ഞു.
കേരള ലളിതകലാ അക്കാദമി ചെയർമാൻ മുരളി ചീരോത്ത് അധ്യക്ഷനായിരുന്നു. മേയർ ബീന ഫിലിപ്, സ്കൂൾ നവീകരണത്തിനു കാരണമായ പ്രിസം പദ്ധതിക്കു നേതൃത്വം നൽകുന്നവരിലൊരാളായ എ.പ്രദീപ് കുമാർ, കോർപറേഷൻ സ്ഥിരം സമിതി അധ്യക്ഷ സി.രേഖ, വാർഡ് കൗൺസിലർ എൻ.ശിവപ്രസാദ്, ഹയർസെക്കൻഡറി മേഖലാ ഡപ്യൂട്ടി ഡയറക്ടർ എം.സന്തോഷ് കുമാർ, വിദ്യാഭ്യാസ ഉപഡയറക്ടർ മനോജ് മണിയൂർ, പ്രിൻസിപ്പൽ കെ.പി. മനോജ്, പ്രധാനാധ്യാപിക എം.ദീപാഞ്ജലി, ലളിതകലാ അക്കാദമി സെക്രട്ടറി എൻ.ബാലമുരളീകൃഷ്ണൻ, അക്കാദമി നിർവാഹക സമിതി അംഗം ലേഖ നാരായണൻ തുടങ്ങിയവർ പ്രസംഗിച്ചു.
ആർക്കിടെക്ട് ബ്രജേഷ് ഷൈജനെ ആദരിച്ചു. ഉദ്ഘാടനത്തോട് അനുബന്ധിച്ചു ചിത്രകലാ ക്യാംപ് നടത്തി. വിദ്യാർഥികൾക്കുള്ള കലാപരിശീലന പദ്ധതിയുടെ ഭാഗമായി ‘ദിശ’ കലാപരിശീലന ക്ലാസും സംഘടിപ്പിച്ചു. അജയൻ കാരാടി, ലിസി ഉണ്ണി, മുഖ്താർ ഉദരംപൊയിൽ, പ്രവീൺ ചന്ദ്രൻ മൂടാടി, സി.ശാന്ത, സുചിത്ര ഉല്ലാസ്, സുധാകരൻ എടക്കണ്ടി, കെ.സുധീഷ്, തോലിൽ സുരേഷ്, വിജയരാഘവൻ പനങ്ങാട് എന്നീ ചിത്രകാരന്മാർ ക്യാംപിനു നേതൃത്വം നൽകി. വിദ്യാർഥികൾക്കു കല, സാഹിത്യം, ചരിത്രം, സാംസ്‌കാരികം, രാഷ്ട്രീയം തുടങ്ങിയ മേഖലകളിൽ അറിവുകൾ പകർന്നു നൽകുന്ന സ്ഥിരം പ്രദർശനം ഇവിടെയുണ്ടാകും. ജില്ലയിലെ എല്ലാ വിദ്യാർഥികൾക്കും കലാസൃഷ്ടി പ്രദർശിപ്പിക്കുന്നതിനും ഗാലറിയിൽ സൗകര്യം ഒരുക്കും.
